Skip to main content
Logo: Te Ara - The Online Encyclopedia of New Zealand. Print all pages now.

Heke Pōkai, Hōne Wiremu

by Freda Rankin Kawharu

Biography

Nō ngā tātai rangatira o Ngāpuhi ki a Ngāti Rāhiri, ki a Ngāi Tāwake, ki a Ngāti Tautahi, ki a Te Matarahurahu me Te Uri-o-Hua tēra tangata toa a Hōne Heke.

Nō te tau 1807, 1808 rānei ka mate atu a Pōkaia i te pakanga i Moremonui i huaina rā ko Te Kai-a-te-karoro, ko Te Haenga-o-te-one. Ka whānau te tama a tana tuahine a Te Kona rāua ko Tūpanapana he tāne, ka tapaia ko Heke Pōkai. Ko ōna tuākana ko Tuhirangi rāua ko Peia he pakeke noa atu i a ia. Ko tō rātou tuahine ko Taingarui i mate tamariki tonu. Hāunga tēnā. Ahakoa kāore i a ia te tūnga mātāmua, nā te mea i heke mai a ia i a Rāhiri, he mana tūturu tōna ake. Rokohanga ka puta te rongo mō ana mahi toa kātahi ka tino kaha kē atu tōna ihi, tōna mana.

He tangata tino rongonui a Heke i roto o Kaikohe ki te raki o Waimate, Pākaraka, Waitangi, Paihia me Te Rāwhiti. I runga tonu i ōna tātai matua, ka riro ki a ia te mana whakahaere o aua rohe. Otirā, ko tana tino kāinga ake ko Kaikohe ā, i noho ia i konei i a ia e taitama ana. Ko tana pā kāinga ko Pā Te Oro, tētahi o ngā pā a Pōkaia. I tū tēnei pā ki te wāhi e mōhiotia nei ko te puke o Kaikohe.

E kōhungahunga ana anō a Heke Pōkai i te kōkiritanga a Ngāti Whātua i tō rātou kāinga i Pā Te Oro i te puke ki Kaikohe. Ka hopukina a Te Kona rāua ko tana tamaiti ka herea ki te pūriri. Kei te tū tonu taua pūriri kei Te Herenga i Kaikohe. Kātahi ka whakamomoka atu te matua o Hongi Hika a Te Hōtete – tū ana me tana mere ki te ūpoko o te toa, o Rewharewha. E ora ai me tuku e ia a Heke rāua ko tana whaea. I te tukunga, ka whati rāua me ngā mōrehu ki te pā i Te Pakinga. I tōna whanaketanga i noho kē atu a Heke ki tana tupuna, ki a Kauteāwhā o Ngāti Rāhiri i te taha moana. Ka pakeke ka whakatūria tōna kāinga ake ki Raihara i Kaikohe. I tēnei rā ko ngā tari a te Kaunihera o Kaikohe kei reira e tū ana.

Ko Heke nā ngā mihinare o te Rōpū Hāhi Mihinare (Church Missionary Society) i ako i tō rātou kura i Kerikeri i ngā tau 1824–1825. I reira ka kitea te hihiko o tōna hinengaro, me tōna kakama; ēngari he taitamariki nanakia. He tipu nui, he tāroaroa. Ko Te Karu Whā (Henry Williams) rawa te tangata i pūmau te ārahi haere i taua autaia i tōna nohoanga i Paihia, ā, i muri i te tau 1837, i Kaikohe.

I Paihia ka moe i tana wahine matua i a Ono, tamāhine a Te Pahi. Tokorua ā rāua tamariki ko Hoani (Hōne), ko Marianne. I te 9 o Ākuhata 1835, ka iriiria a Heke rāua ko Ono ki ō rāua īngoa hou, ki a Hoani (Hōne) Wiremu, ki a Rīria. Ahakoa anō mau tonu a ia ki tana īngoa ki a Heke Pōkai. Kei ngā pukapuka iriiri e kīia ana rāua he 'Wahine Whakahirahira – he wahine rangatira', he 'Tangata Pūwhero – he rangatira'. Na, ka taka ki te 23 o Ākuhata ka iriiria ko Marianne. Ō rātou īngoa iriiri katoa i ahu mai i te whānau a Te Karu Whā. I whai rawa a Hōne Heke i te hōhonutanga o ngā kōrero o te Paipera, ā, he wā ka whakaputaina i roto i ana whaikōrero. Kore i roa kua tū hei kaikōrero reimana i te Hāhi Mihinare.

Kāore tonu i roa i muri i tōna iriiringa, ka mate a Rīria. Ko ngā tamariki, e itiiti ana anō ka matemate. Ka moe wahine anō a Hōne Heke. I mārenatia rāua ko Hāriata Rongo tamāhine a Hongi Hika ki te whare karakia i Kerikeri i te 30 o Maehe 1837. He wahine toa, he wahine whai mana mai i ōna mātua tūpuna. I noho i te kāinga o James Kemp, mihinare o te Rōpū Hāhi Mihinare, ka akona ki ngā āhuatanga a tauiwi.

Ahakoa ana mahi mā te hāhi, tū tonu a Hōne Heke ki ngā pakanga i tōna takiwā. Ko te pakanga tuatahi i tūria e ia i Kororāreka (Russell) i te tau 1830. I te tau 1833 ka uru ki te ope taua a Tītore ki Ōtūmoetai, i Tauranga. I reira ka taotū ka whakahokia ki te kāinga. I te tau 1837 ka pakanga ki a Pōmare II rāua ko Te Mauparāoa i Ōtūihu, ka waimarie ka puta. Kua pakeke te tū, kua pakari, kua toa, kua māia a Heke i roto i te riri. Kua hau ōna rongo. Kua kitea atu ae mārika ko te uri tēnei o Rāhiri!

Nō te tau 1840 ka tau mai a Rūtene Kāwana Wiremu Hopihona (William Hobson) ki Pēwhairangi (Bay of Islands) ki te whiriwhiri ki ngā rangatira Māori kia whakaae rātou kia ūhia te mana o te Kuini o Ingarangi ki runga ki tēnei whenua. Ka takoto te Tiriti o Waitangi i roto i ngā reo e rua – te reo Māori, me te reo o tauiwi. He roa e whiriwhiria ana, e tautohetia ana, e wānangatia ana te Tiriti. Ko ngā rangatira i whakamau atu i ō rātou tohu ki te wāhanga Māori i whakaaro iho kua mārama te kaupapa. I hua rātou ka uru atu ngā rangatira Māori me ō rātou iwi ki raro i te maru o te Kuini o Ingarangi. Ko te oati mai a te Kuini ka tohua e ia ngā mana rangatira, ngā whenua me ngā taonga Māori katoa; ā, ka tau mai hoki ngā tika me ngā painga katoa o te iwi o te Kuini ki runga ki te iwi Māori. Ēngari, me kī taurangi rātou ka pūmau mārika rātou ki te mana o te Kuini. Tino pono tō rātou whakaaro ka mau tonu tō rātou rangatiratanga. I te 6 o Pēpuere 1840 i muri i ngā tauwhiriwhiri, ka haea atu ngā tohu rangatira o te rārangi kahukura o Ngāpuhi – ko ētahi i tuhi tonu i ō rātou īngoa. E whai ake nei te īngoa tuatahi i tuhia: Hōne Heke nō Te Matarahurahu. Ka whai atu te 44 i muri i a ia.

Kore i roa kua amuamu ētahi. Whāia hoki ka whakanuku a Hopihona me tana kāwanatanga ki Ākarana (Auckland) ka whakarērea a Kororāreka. Riro katoa atu ngā huarahi oranga mō te iwi. Kātahi ka tākehia ngā rawa e heria ana hei hokohoko; ka whakapikingia hoki ngā utu o ngā mea katoa. Tuarua, ka hurihia ngā moni tāke i ngā kaipuke ki te kāwanatanga. Kātahi ka tino hē rawa atu. Āpiti atu, ka rāhuitia ngā kauri, me whakamutu te topetope; me ngā whenua, kia kaua e hokohokona. Nā te kāwanatanga katoa ēnei whakakati. Whakatakariri tonu atu a Hōne Heke ki ēnei whakararu. Kua whakaparahakotia ngā tikanga Māori. Kua tū mai ko ngā whakahaere a te Pākehā anake. Mārama katoa tērā āhua i te whakawākanga o Maketū tama a Ruhe i te tau 1842. I tārewahia mō tana kōhurutanga i te whānau Pākehā. Ēngari kia kōhuru te Pākehā i te Māori, kāore e whakamatea. Heoi, kua kite a Hōne Heke kei te whakangaromia e te Karauna o Ingarangi te mana o te iwi. Kua tirohia atu ko te kara o Ingarangi te tohu o tōna mana takahi i te mana Māori. Na, ko te pou kara i Kororāreka nā Heke anō i tuku ēngari mō te kara Māori kē. Te tūnga ake o tētahi o ngā toa rangatira a Heke, o Te Haratua me tana tira, ka topea taua pou kara i te 8 o Hūrae 1844. Ka whakahē a Tāmati Wāka Nene me ētahi anō o ngā rangatira o Ngāpuhi ki tērā āhua. Ko te kāwana, ko Pitiroi (Robert FitzRoy) i Ākarana e noho ana. Ka tukua tana tono ki Ahitereira, ki New South Wales, kia tukua mai he hōia hei āwhina i a ia.

Heoi poto nei te kupu a Heke ki a Pitiroi, kua hē ia, ā, ka whakahoungia te pou kara. Ka whakaarahia he mea hou, ehara, ka topea anō e Heke i ngā rā 9, 10 rānei o Hānuere 1845. Pērā anō i te 19 o Hānuere. Taka rawa atu ki te Pēpuere ka tau mai ngā hōia ki Kororāreka. Ka noho tētahi wāhanga ki te tiaki i te pou kara; ka noho mai te wāhanga tuarua ki te take o te hiwi. Nō Maehe ka tū mai ko Heke rāua ko Kawiti ki te pakanga ki ngā Pākehā. Ko Kawiti ki tētahi takiwā, ko ngā toa o Te Kapotai he takiwā kē, ka riro anō a Heke ki te tope i te autaia pou kara rā i te 11 o Maehe 1845. Ka whā ai ngā topenga. Takoto tonu atu tēnā pou kara. Tētahi kakari kikino tērā, ēngari kīhai te nohoanga tangata i Kororāreka i tūkinotia.

Heoi, ka nukuhia ngā Pākehā, kātahi ka karawhiua mai a Kororāreka ki ngā pū nunui o te manuao, o Hazard. Ahakoa tonu, i tukua atu e Heke tana Pākehā, a John Bedggood rāua ko tana hoa ki te tiki i ngā moni a tētahi o ngā kaihokohoko. Nō konei ka tahuri ngā tāngata whawhai katoa, Pākehā, Māori, ki te muru i ngā taputapu i whakarērea mai. Ka whakatakotoria e Heke te rāhui ki te taha tonga hei aukati mai i te katoa. I waimarie ai te whare karakia me te whare mīhana o ngā Mihinare; te whare o te Pīhopa Katorika me tana perehi tā pukapuka; me ētahi atu o ngā whare i roto i te rāhui.

I muri mai i te murunga o Kororāreka ka hoki a Heke ki tōna pā i te tuawhenua ki Te Ahuahu. Ko Pukenui anō tētahi o ngā īngoa o taua pā. I tū tata atu ki te roto i Ōmāpere. Mōhio tonu ia tērā e puta ngā hōia a te kāwanatanga ki te aru i a ia. Ka whakahaua tana iwi kia mahia he pā tūwatawata ki Puketutu ki te puke ki Te Māwhe. Pērā anō a Tāmati Wāka Nene. Kua nuku me tana tira ki te pā i Ōkaihau. Ko te mahi a ngā tokorua nei – i ngā awatea anake – ka whakatū ngā hoa tauwhainga, ēngari kāore i pakanga kia mate rawa. He aha rā kua whakaritea he wā whakangā, ka noho, ā, ka tīmata anō te whawhai.

Taka rawa atu ki a Āperire 1845, ko te taenga mai o Kānara William Hulme me tana tira ki Pēwhairangi. E 460 te kaha, he hōia whenua, he hōia moana, me ngā tūao. Ka mā raro atu i roto i te marangai ki kō mai i Ōkaihau, e rua māero te tawhiti i te pā o Heke. Tērā a Heke te tatari mai rā kia tukia atu tana pā tūwatawata. E rua ngā haerenga atu o te minita Mihinare, o Robert Burrows kia houhia te rongo, kīhai a Heke i aro atu. He mōhio nōna e whai kē ana te āpiha Pākehā kia taka te mana o Hōne Heke ki raro i tō te Pākehā.

Nō te 8 o Mei 1845 ka whakaeke ngā Pākehā me ā rātou matā e rere pārorirori ana i runga ake i Puketutu. Ko Kawiti me tana taua i waho i te pā e tū atu ana ki te hoariri. Tēnā riri kino. Whakamau rawa ngā hoari ki ngā pū kātahi ka kōkiri. Ko Heke me ana pū, mau tonu mai i roto i te pā. E kore tōna pā tūwatawata e ngāueue. Hoki atu ana a Hulme me ana mōrehu – kua ngoikore i te māeke, i te matekai, i te rarunga hoki. Aoake ka karangatia a Burrows kia haere mai ki te nehu i ngā hōia Pākehā i te whakaritenga Karaitiana.

Ka hoki a Heke ki Te Ahuahu ka waihangatia anō he pā whawhai ki Ōhaeawai. Ehara koa, ka whakatū kē tonu rāua ko Tāmati Wāka Nene. I te 12 o Hune i a Heke e ngaro atu ana ki te mahi kai, ka puta tētahi rangatira o Te Hokianga ko Makoare Te Taonui. He hoa nō Tāmati Wāka Nene. Ka hua kāore he tangata i Te Ahuahu ka tomokia ka riro i a ia. Ko te riringa o Heke! Kua riro tana kāinga ki raro i te mana o Wāka Nene. Ka kakari kia hoki mai anō ki a ia.

I te wehenga mai o Heke i Puketutu ki Ōhaeawai ka hau ōna rongo, ka whakapiri mai tana whanaunga o Ngāti Tautahi a Te Kākaha (Kahakaha). Tēnā ia i mua, piripono kē a Te Kākaha ki a Hongi Hika. Ka rongo a Heke kua taotū, e whakahemohemo ana a Te Kākaha, ka rere ki te tiki ahakoa te mōrearea. Ka whakatau oha ake a Te Kākaha ki te pūmau o tana tautoko i a Heke. Ka amohia mai ki te tohunga ki a Papahurihia me ana kaiāwhina. Ēngari nō te kitenga atu o te tohunga i a Heke e nanao atu ana ki te pū a te hoariri, he pū i panipania kia wherowhero katoa, ka hopo tōna ngākau. He mate kei te haere. Kore i roa ka whara ko Heke. I tū te hūhā i te matā. E ai ki tā ngā kaiamo i tūmatapōngia rātou e Papahurihia, ka puta. Ko te taokete o Heke ko Wī Pohe o Whāngārei i mate rawa. Ko Te Haratua i kaiākiko ēngari kāore i mate.

Na, ka kawea a Hōne Heke ki Kaikohe, ki ngā wai ariki i Ngāwhā, ki Ōhaeawai. Ko Te Karu Whā rāua ko Burrows ki te torotoro atu. I te taumaha o te māuiui o Heke, ka mauria e ngā iwi o Tautoro ki ō rātou tohunga rongonui, ki a Kūao, rātou ko Tāmati Pehikura mā. I tautoko katoa ēnei tohunga i a Heke. Na, ko ngā kea o tōna hūhā he mea tanu. I tōna mananui ka whakatapua taua wāhi; ka taiepatia ki te kōhatu kia kore ai e takatakahia, e whakatipungia rānei ki te kai.

Ahakoa e takoto māuiui ana, whai tonu a Heke i ana kaupapa. Kua riro ko te pene hei rākau māna. Ka tukutuku i ana reta ki a Pitiroi, ki a Hōri Kerei (George Grey), ki a Te Karu Whā me ētahi atu o ngā mihinare. Ko tana kupu ki a Pitiroi ehara i te mea e whai ana ia ki te patu i ngā Pākehā. Kāo. Ā, ka tuku i tana pitihana kia tau te rangimārie, kia mau te rongo. I te nanakia o Pitiroi, ka tohe kia utua ki te whenua. He aha te aha! Ka hoki tērā ki Ingarangi, ka puta mai ko Kāwana Kerei – he tangata mārō! Ka tohe anō a Heke kia mau tonu ngā tika o te iwi me te mana Māori. 'Nā te Atua i hanga tēnei whenua mō mātou. E kore e taea te tapatapahi; mehemea he tohorā, kua tapatapahia. Hoki atu koutou ki tō koutou nei whenua, ki te whenua i hangaia mai e te Atua mō koutou. Nā te Atua tēnei mō mātou, ehara mā te tangata tauhou, ehara mā tauiwi hei rahurahu tō mātou whenua tapu.' Wheke tonu atu a Kerei. I taua wā anō rā, kei te hanga a Kawiti i tana pā i Ruapekapeka. Ōrite tonu ō rāua whakaaro ko Heke mō ngā tika me te mana whenua o te iwi. Kāore ana whakapae nō wai te hē. Ā, ka tū mai anō te riri. Ka puta anō ngā hōia Pākehā, maha atu, kaha atu, tōtika atu. Ko Nene te kaiāwhina i a rātou. I te ngaro kē a Hōne Heke ka tae atu ngā hōia Pākehā. Nō te 10 o Hānuere 1846 ka hoki mai me ana toa, e 60 ki te āwhina i a Kawiti. I reira a ia i mua o te pakanga. Noho whakapāpā tonu te mahi a Heke rāua ko Kawiti.

Kua rua wiki kē te pā o Ruapekapeka e ākina ana. Nō taua rangi rā anō, te 10 o Hānuere, ka whati. Ka kīia e Kānara Henry Despard rāua ko Kāwana Kerei i horo te pā i a rātou i te Rātapu te 11 o ngā rā. Kakari noa a Kawiti kia hoki mai tana pā kore kau i taea. Ko tērā kōrero tērā. Ā, he kōrero kē anō e kī ana i ārahina kētia e Hōne Heke tana tira ki waho i te pā karakia ai. Anei kē te kōrero tika: i whakarērea e Hōne Heke a Ruapekapeka, ka waiho atu a Kawiti me ana toa torutoru noa nei, nā te mea i pau ngā kai me ngā matā. Nā reira ka āta whakatahi te iwi me i kore te hoariri e whai atu ki te ururua o te ngahere i tua atu o te pā, kia haupapatia ai e Heke me ana toa.

Ko te kōrero he rawa atu: i wehe atu a Heke i runga i te ngākau pōuri i tō rātou hinganga. Whakamutua atu tērā kōrero – mau tonu tōna mana tiketike, ā, e haere tonu nei. I āta wānangahia e rāua ko Kawiti te tūnga mō ō rāua pā tūwatawata me ngā whakahaere mō ā rāua pakanga. Kāore ā rāua tūkino i ngā Pākehā kua tau te noho, ēngari ia i manawapā kia tiakina rātou. Iti noa te pākarukaru o ā rātou taputapu; ēngari ngā hōia i Te Waimate, pērā noa atu ā rātou mahi kino ki ngā taputapu ki reira.

He wiki i muri mai ka huitahi a Heke, a Kawiti me Wāka Nene ki a Pōmare II te rangatira i tū kē mai i rahaki. Rite tonu te kōrero – tuatahi, kia houngia te rongo; tuarua, mā Tāmati Wāka Nene e kawe te kōrero ki a Kāwana Kerei i Ākarana. Ka puta te pānui whakararata a Kerei. Kāore he kōrero raupatu, ēngari ia kua ea i ngā pakanga te whakawhiu i ngā autaia Māori rā! E whā ngā marama i muri mai ka mau te rongo i a Kawiti, ēngari a Heke kore rawa ia i whakaae kia tuohu atu a ia ki te kāwana. Kia pahure rawa ngā tau e rua, kātahi anō rāua ka tūtaki i te kāinga o Burrows i te mīhana i Te Waimate i te tau 1848. Ka tukua e Heke tana mere pounamu hei koha ki te kāwana – hei tohu kua rata atu a ia; kua whakaae ia ki te noho a Kerei i tēnei whenua; ā, ka taria atu te whakaūnga a te māngai o te Kuini i ngā whakaritenga a te Tiriti o Waitangi. Na, i te nanaotanga mai a Kerei ki te taonga, he tohu tērā ki a Heke ka kawea e ia ngā tikanga, ngā ritenga o tōna tūnga kaitiaki.

Ka tatū te noho a Heke i waenga i tana iwi i Tautoro, i Kaikohe, e haere tonu ana āna mahi tuhituhi. Nā ana pukapuka ki a Te Karu Whā, ka tau te rangimārie ki a rāua. Whakapuaki tonu mai a Te Karu Whā i tana āwangawanga he riro ko ngā mahi tohunga a Papahurihia hei ara mō Heke. Inā rā, nui kē ake te whakaaro o Te Karu Whā ki te taha wairua o Heke tēnā ki te whakaheke o tana tinana i te māuiui. Rite tonu tana aki mai ki a Heke 'kia waihotia atu ērā waiata o te pō ki te pō. ' He aha hoki kei te tahuri o Heke ki a Papahurihia; ko te mea kē i pērā rawa rānei te rerekētanga o ana whakahaere i tā ngā Karaitiana.

Nā wai ā, ka kaumātuatia a Heke ka pāria e te mate kohi. Ahakoa anō, i mau tonu tana mana rangatira, tana mana tangata, tana mana whenua. Ko ia tonu ki te whakahaere i tana iwi, me ngā ture. Me te iwi anō hoki whakamau tonu mai ki a ia hei kaiārahi, hei rangatira mō rātou. I mua i tōna hokinga ki Kaikohe ka punarua – ki a Kahutaha pea – ko Rongo rā hoki te wahine matua. Nō konei ka taupatupatu ana tikanga. Kua raruraru te taha Karaitiana. Whāia ka matemate ana tamariki e rua, ka whai kia puta he uri mōna. Kāore i rite tana hiahia ka mahue a Kahutaha. I te hokinga atu ki Kaikohe ka puta te riri o Rongo ka tahuri tonu iho ki a Heke. Kore rawa i hamumu ake. Ka ea te whakatakariri o Rongo ka aroha anō ki tana tāne, ka noho ki te tiaki, ā mate noa a Heke.

Ahakoa te taumaha o tōna māuiui, kei te rērere tonu ana pukapuka ki ngā tāngata huhua noa iho. I tana pukapuka whakamutunga ki a Kāwana Kerei e whai ake nei, ka rongo tonuhia iho tōna ngākau aroha, me tōna whakarangatira i a Kerei; ōna tūmanako, me tōna whakapono ki te Atua. 'E hoa e te Kāwana tēnā rā koe – kua tae mai tō pukapuka aroha ki ahau nā ko taku pukapuka aroha tē nā ki a koe āe e nui ana taku mate kaua koe e pōuri e hara tēnei i te kāinga pūmau mō te tinana mā te Atua te whakaaro kia tāua e kore e maha atu aku kupu ki a koe nō te mea hoki e nui ana taku mate, hoatu taku aroha ki tōu hoa kia Mihi Kerei tēnā rā ko kōrua ko tōu hoa.'

Nā te mihinare, nā Te Rēwiti (Richard Davis) o Kaikohe i tiaki te taha wairua o tēnei rangatira i te whakahekenga o tōna tinana. Me tana iwi hoki i noho tonu ki tana taha. He maha te hunga i haere tūtata mai, i haere tawhiti mai ki Kaikohe. Ka tata te hemo ka pātaia te pātai ki whea rātou noho ai ka ngaro atu ana ia. Ko tana whakautu: 'I te oranga mutungakore.'

Nō te 6 o Ākuhata 1850 ka mate a Hōne Heke. Āu mahi a te tangata whakahirahira ka muia e te hunga tono kia takoto a Hōne Heke ki ō rātou marae. I whakakāhoretia te inoi a Te Rēwiti kia nehua ki te whakaritenga Karaitiana, ēngari i tukua ki a ia tētahi wāhanga o te karakia i mua o te hikinga o te tūpāpaku. Kei te kōrero tonuhia tōna takotoranga whakamutunga. Tētahi kōrero kei te tihi o Pūtahi i waho atu o Kaikohe e tanu ana. He kōrero anō i mauria kē ki Pākaraka i te mea i whakarata rawa rāua ko Te Karu Whā ki a rāua. Ēngari rā ia i haere huna kē te hunga tāpuke i a Hōne Heke i te wāhi tapu i Kaungarapa i te takiwā ki Pākaraka. Tērā a Ērana Pare te pouaru a Nareta mokopuna a Peia tuakana o Heke, i tōna kaumātuatanga ka kōrero mō te āhua ki ngā kaiamo tūpāpaku ki Kaungarapa. Ka tata atu ki te wāhi tapu kua puta mai a Papa, he mokomoko kākāriki. Me unu katoa ngā kākahu o ngā kaiamo ka haere tahanga atu. Koia te tapu o taua wāhi.

Ko Tū-kai-taua, ko Tū-ka-riri tērā tangata a Hōne Heke. I tōna kitenga kei te takatakahia te iwi ka tū, ka riri. Ka hua ia ki ngā mahi nanakia a tauiwi; ki tewhakakāhoretia o te mana o te kupu i takoto i mua i ngā rangatira Māori me ngā māngai o te Kuini o Ingarangi;tae atu hoki ki ngā ture pēhi i ngā tikanga Māori; topetopea atu te pou kara – ē, ko Tū-kai-taua! Ehara i ngā tāngata whai te hē, ēngari nō te kāwanatanga me ana mahi takahuri i ngā kaupapa. Ka tae ki te wā i whakapaea ake ai ana rākau-ā-Tū, ka nanao atu ki te rākau tuhituhi hei kawe i ana whakaaro; hei whakatakoto i ana kaupapa mō tana iwi; hei whakatūpato atu ki te kāwanatanga kia tukua mā te iwi anō e whakatau e whakarite ngā tikanga mō rātou, arā, te mana motuhake.


He whakaaturanga anō

Rārangi pukapuka

    Belich, J. The New Zealand wars. Auckland, 1986

    Buick, T. L. New Zealand's first war. Wellington, 1926

    Burrows, R. Extracts from a diary kept by the Rev. R. Burrows during Heke's war in the north in 1845. Auckland, 1886

    Rutherford, J. Hone Heke's rebellion. Auckland, 1947

    Wards, I. The shadow of the land. Wellington, 1968


Me pēnei te tohu i te whārangi:

Freda Rankin Kawharu. 'Heke Pōkai, Hōne Wiremu', Dictionary of New Zealand Biography, first published in 1990. Te Ara - the Encyclopedia of New Zealand, https://teara.govt.nz/mi/biographies/1h16/heke-pokai-hone-wiremu (accessed 30 September 2020)