Kōrero: Ngā iwi o Hauraki

Ko te rohe o Hauraki, ka tīmata i Mahurangi i te taha whakateraki o Tāmaki-makaurau, ka ahu atu ki Katikati i Tauranga. He maha ngā iwi kua hanumi ki ētahi atu iwi i te rohe o Hauraki. Nā ngā pakanga, ngā heke, ngā moenga, ngā tuku whenua, ka whai wāhi ai ngā iwi maha ki ngā whanga, ngā moutere, ngā kūrae o te rohe nei.

Story by Te Ahukaramū Charles Royal
Te āhua nui: Te Moengahau-o-Tamatekapua

Story Summary

Ngā whakaahua

Ngā iwi o Hauraki

Ko te rohe o Hauraki ka karapoti i ngā takiwā o Tāmaki, o Te Hapū-a-Kohe, o Piako, o Ōhinemuri, o Te Wairoa, o Moehau, o Whangamatā. Ahakoa te mea kei ngā iwi o Marutūahu te mana nui i te rohe, he kāinga tonu a Hauraki nō ngā iwi maha.

Te Patukirikiri

Ko Kapetaua te rangatira o Te Patukirikiri, he wāhanga o te Wai-o-hua, he iwi nō Tāmaki. I tapaina rātou ki te ingoa Te Patukirikiri i a rātou ka toa ki tētahi pakanga - ko ngā kōhatu, ko ngā kirikiri anake ā rātou patu.

Ngāti Hako

Ko Ngāti Hako te iwi tuatahi kia noho ki Hauraki. Ka pūmau tā rātou noho hei iwi i te moenga o Ruawehea, te tapairu o Ngāti Hako ki a Tamaterā, te tama a Marutūahu.

Ngāti Huarere

He maha ngā wāhi i Hauraki ka ū a Te Arawa. Ko ētahi o ana tāngata i noho ki Hauraki, ka whakaingoatia e rātou ētahi wāhi o te whenua. Ko Ngāti Huarere i ahu mai i a Huarere, te mokopuna a Tamatekapua, te rangatira o te waka a Te Arawa. Ko Tamatekapua i tanumia ki runga o Moehau, tōna ingoa tūturu ko Te Moengahau-o-Tamatekapua.

Ngāti Hei

Ko Ngāti Hei, he uri whakaheke nō Hei, te matua kēkē o Tamatekapua. Nā tā rātou kaha i roto i ngā pakanga ki ngā iwi o Marutūahu o Ngāpuhi, kei te tū tonu rātou. Ko Te Whitianga-o-Kupe tō rātou wāhi noho.

Ngāi Tai

He huānga tata a Ngāi Tai o Hauraki, ki a Ngāi Tai o Te Moana-a-Toitehuatahi, mā roto i ngā moenga a ngā tuāhine tokotoru mai i Te Moana-a-Toitehuatahi - a Te Rau-kohekohe rātou ko Motu-i-tawhiti, ko Te Kaweinga ki ā rātou tāne nō Hauraki. Whakapapa tahi mai ai ngā iwi o Ngāi Tai i te waka a Tainui.

Ngāti Pūkenga

Ko te iwi o Ngāti Pūkenga i ahu mai i te waka a Mataatua. Nō te rau tau 1800 hūnuku atu ai rātou i Tauranga ki te takiwā o Moehau.

Ngāti Rāhiri

I tau te tipuna a Rāhiri ki Whakatāne mā runga i te waka a Mataatua, ā, haere ake, ko ia tērā i whai i te heke ki Te Tai Tokerau. Nāwai, ka hoki ia mā Hauraki ki Whakatāne. Ka noho tētahi wāhanga o tōna tira ki Hauraki. Tapaina ai rātou ko Ngāti Rāhiri.

Taupori

I te tataunga iwi o te tau 2013, e 3,000 ngā tāngata i kī he uri rātou nō ngā iwi o Hauraki.

Me pēnei te tohu i te whārangi:

Te Ahukaramū Charles Royal, 'Ngā iwi o Hauraki', Te Ara - the Encyclopedia of New Zealand, http://www.TeAra.govt.nz/mi/nga-iwi-o-hauraki (accessed 17 June 2019)

Story by Te Ahukaramū Charles Royal, published 8 Feb 2005, updated 3 Mar 2017