Kōrero: Ngā iwi tuatahi

Whārangi 2. Tāne, Hineahuone, Hine

Ngā whakaahua

He nui ngā kōrero mō te putanga mai o te tangata i te whenua. Tīmata ai ngā kōrero nei i a Ranginui rāua ko Papatūānuku, ngā mātua o Tāne, te atua o te ira tangata. E kī ana ētahi ko Tūmatauenga - tērā o ngā tamariki a Rangi rāua ko Papa – koia kē te atua o te tangata.

Whakanuia rawatia a Tāne i roto i ngā kōrero tuku iho. Ko tētahi o āna mahi nui ko te poke i te wahine tuatahi mai i te one i Kurawaka. Ko Hineahuone te ingoa o taua wahine. Nā Hineahuone rāua ko Tāne, ko Hinetītama. Nō muri karangatia ai ia ko Hinenuitepō. Ko Hinetītama te kaitiaki o ngā tatau o te pō me te rā, o te pōuri me te māramatanga. Kitea ai a Hine i ngā ata i te whitinga me te toremitanga o te rā. E kī ana te kōrero, koinei ngā tīpuna o te tangata.

Anei he wāhanga o tētahi kōrero mō te auahatanga o Hineahuone:

Ka karanga atu a Tāne, ‘Kei te kimi tātou i te ara ki te wahine. Koinei tā tātou mahi.’ Ka whakautua tana kōrero e rātou, ‘Haere ki te one i Kurawaka, ki reira mahi ai. Kitea ai te wahine ki reira, he wahine tapu, i te mea kei a ia te mauri o te tangata.’ Kātahi ka haere rātou kia tae ki te one i Kurawaka. Ka auaha mai ko ngā kōhiwi, ko te māhunga, ngā ringa, te tinana, ngā waewae ngā kūhā i te otinga o te hangaa o te kōhiwi 1
Kupu tāpiri
  1. S. Percy Smith, The lore of the whare-wananga, vol. 1. New Plymouth: T. Avery for the Polynesian Society, 1913, p. 34. › Back
Me pēnei te tohu i te whārangi:

Te Ahukaramū Charles Royal, 'Ngā iwi tuatahi - Tāne, Hineahuone, Hine', Te Ara - the Encyclopedia of New Zealand, http://www.TeAra.govt.nz/mi/nga-iwi-tuatahi/page-2 (accessed 22 October 2019)

Story by Te Ahukaramū Charles Royal, published 8 Feb 2005