Kōrero: Ngā karakia a te Māori

Whārangi 3. Ngā huatau wairua

Ngā whakaahua

Mana

Ko te mana whakaheke ka heke mai i ngā atua ki ngā rangatira, ngā ariki me ngā tohunga, ā, ki ngā tāngata katoa.

He tino hāngai hoki tēnei mea te mana ki te tapu.

Tapu me te noa

Ko te tapu o te tangata ka heke mai i ona mātua tīpuna, i ngā atua. He nui ake te tapu o te hunga matāmua.

Ka taea tonu ngā mea ora katoa te noho tapu. Inā ka noho tapu tētahi tangata, tētahi mea rānei, ka tūpato ake te mahi a te tangata ki a ia.

Ko te noa, kāre kau ōna tapu. Nui atu ngā kawenga hei wetewete i te tapu e noho noa ai tētahi mea, tētahi tangata rānei.

Mauri

Kei ngā mea ora katoa tēnei mea te mauri. He mauri tō ngā mea ora katoa. He wā kua whakanōhia e te tangata he mauri ki te ngahere ka mutu ka tiakina.

Ki te haumate haere te mauri o te tangata, ka mate ko ia.

Hau tipua

I te hīnga ake e Maui Te Ika-ā-Maui ka mea ia ki ōna tuākana, ‘[K]aua hoki e kotikotia tā tātou ika; engari waiho kia tae au ki te kawe atu i te hau o tēnei tanga-ika; ā, kia tae atu au ki te tohunga, kia whāngaia ki te atua, ka hurihia te hurihanga takapau, ruahine rawa, kakahi rawa, ka noa’.1

Hau

Ko te mahi a te mauri he tiaki i te hau o te tangata, o te wāhi ranei. Mēnā ka whai mauri te ngahere, ka nui kē atu ōna manu, ōna ika rānei.

Wairua

Ka taea e te wairua te wehe atu i te tinana o te tangata haereere ai. Ka mate mai te tangata, ko tōna wairua ora tonu. E ai ki ngā korero i ngā wā o mua, ka mate te tangata, ka rere tōna wairua ki Rarohēnga. Hei ngā kōrero o te Tai Tokerau, ka takahi taua wairua i te ara wairua ki te rerenga wairua. I reira ka heke ki raro ki te wai.

Kupu tāpiri
  1. George Grey, Ko nga mahinga a nga tupuna Maori. Rānana: George Willis, 1854, wh. 22. Back
Me pēnei te tohu i te whārangi:

Basil Keane, 'Ngā karakia a te Māori - Ngā huatau wairua', Te Ara - the Encyclopedia of New Zealand, http://www.TeAra.govt.nz/mi/nga-karakia-a-te-maori/page-3 (accessed 24 September 2019)

Story by Basil Keane, published 5 May 2011