Kōrero: Ngāti Maniapoto

‘Kia mau tonu ki tēnā; kia mau ki te kawau mārō. Whanake ake! Whanake ake!’

Koinei ngā tohutohu a te tupuna a Maniapoto ki tana iwi i mua i tōna matenga. He tauira tēnei o te pūmautanga o te iwi i roto i ngā tau maha, e whakaaturia ana i roto i ngā mahi ōhanga, i te whakatūnga o te Rohe Pōtae me te tiaki a te iwi i āna tikanga.
Story by Tūhuatahi Tui Adams and Paul Meredith
Te āhua nui: Te tupuna a Maniapoto

Story Summary

Ngā whakaahua

Whenua

E noho ana a Te Kūiti ki te manawa o te rohe kei te puku o te Ika a Māui. Kei te tonga ko te pae maunga o Rangitoto. Ko te kōrero e whakaponotia ana, ki te rarapa te uira ki aua maunga, he tohu o te mate.

Ko te maha o ngā papakāinga kei ngā whanga me ngā whārua mōmona pērā i a Waipā. E ai ki ngā kōrero koinei te nōhanga o Waiwaia te taniwha o te iwi.

Ngā tūpuna

Whakapapa mai ai a Ngāti Maniapoto i te waka i a Tainui, i te tupuna i a Tūrongo.

I te rau tau e 1600 e ora ana a Maniapoto. Ko tētahi kōrero rongonui mōna, i te wā e whakahemo ana tōna matua a Rereahu, ka tukua e ia tana mana ki a Maniapoto, kāpā ki tana mātāmua. Ka tohua e ia kia ngaua e Maniapoto tōna ūpoko kua pania kētia ki te kōkōwai. Nā ngā ngutu whero o Maniapoto i whakaatu koia te mea i tohua hei rangatira.

Te haerenga mai o te Pākehā

I whakamoea ngā puhi o Ngāti Maniapoto ki ētahi tāngata whai Pākehā, kia hua ko ngā whānau Pākehā-Māori whakahirahira. Ko Louis Hetet, tētahi tangata Wīwī, ka moe i a Paeata te tamāhine a tētahi rangatira. Kia taka ki te rau tau 1900 ka hau te rongo mō tētahi o ō rāua uri, te kaiwhatu rongonui a Rangimārie Hetet.

Te Kīngitanga

I te tau 1857 ka whakatūria he kīngi Māori e ngā iwi ki te aukati i te hoko a te Pākehā i ngā whenua. Ka tū te aukati ki te Pākehā huri noa i te Rohe Pōtae. Nō te tau 1883 ka hiki te aukati.

Ngāti Maniapoto i ēnei rā

Hei te tau 2013, e ai ki te tataunga iwi e 35,000 te nui o ngā tāngata o Ngāti Maniapoto. Ko te marae nui o te iwi kei Te Kūiti. He tini te tangata kua hūnuku kei waho atu i ngā kāinga tipu; hāunga tērā kei te kaha te Poari Māori o Maniapoto ki te whakapūmau i te tuakiri me ngā hiahia o te iwi. Ia rua tau, ka hokihoki ngā uri ki te wā kāinga ki te whakataetae hākinakina, ki te whakanui hoki i tō rātou tū hei Maniapoto.

Me pēnei te tohu i te whārangi:

Tūhuatahi Tui Adams and Paul Meredith, 'Ngāti Maniapoto', Te Ara - the Encyclopedia of New Zealand, http://www.TeAra.govt.nz/mi/ngati-maniapoto (accessed 21 August 2019)

Story by Tūhuatahi Tui Adams and Paul Meredith, published 8 Feb 2005, updated 22 Mar 2017