Kōrero: Te Whutupaoro Māori

Whārangi 6. Te wahine i te whutupaoro rīki me te uniana

Ngā whakaahua

Te whutupaoro uniana

Nō te tau 1891 ka tīmata te whai kia kuhu te wāhine ki te tākaro whutupaoro i Aotearoa. Heoi anō, nō te tekau tau 1980 ka kitea nuitia te wahine i ngā tākaro. I waenganui rawa o te tekau tau 1980 i tīmata ai te puta o ngā tīma whutupaoro wahine, rīki atu, uniana atu, ki ngā rohe, na, ka whiria te tīma whutupaoro wahine tuatahi ā-motu, i te tau 1989. E whā ngā whakataetae o te ao, tau atu, tau mai, kua toa te tīma nei e mōhiotia ana ināianei ko te Black Ferns.

He wāhi nui tō ngā wāhine Māori i te angitu o te tīma. Ko ētahi o ngā kaitākaro Māori rongonui ko Farah Palmer (o Tainui, Maniapoto hoki) – ko ia te kāpene o te Black Ferns i te toru tau tuatahi i toa ai rātou i te whakataetae o te ao; ko te kaiwhakapāoho pouaka whakaata, ko Melodie Robinson (o Ngāi Tahu), ā, ko Louisa Wall (o Ngāti Tūwharetoa, Waikato hoki), mema paremata  – he kaitākaro hoki i ngā tīma ā-motu mō te whutupaoro me te netipōro. Ko te haka a te Black Ferns ko ‘Ko uhia mai’, he mea tito nā Te Whetū Tipiwai.

He wāhine toa

Hei tā ētahi, inā kē te tokomaha o te hunga wāhine Māori e tākaro whutupaoro uniana ana me te rīki hoki, nā te rerekē o tēnei mea te wāhinetanga i te ao Pākehā me te Māori, ko tā te Māori kē hoki, he tū toa, he tū māia kē te tū tika a te wahine.

Te whutupaoro rīki

I te tau 1995, ka whakatūria te tīma rīki wāhine Māori ā-motu e kīia ana ko te Kiwi Ferns. Rite tonu ki te tīma uniana, e toru ngā toanga o te tīma rīki wāhine, tau atu, tau atu, mai i te tīmatatanga o te whakataetae rīki o te ao i te tau 2000.

Ka nui te wāhi ki ngā wāhine Māori i roto i te rīki wāhine. Ko tētahi ko Lynley Tierney-Mani tonu, he kaitākaro nō mua nō te tīma Kiwi Ferns, ka mutu hei kaitohutohu hoki ia mō te tīma i te tau 2012. Ka whakataetae te tīma rīki wāhine Māori o Aotearoa i te whakataetae Rīki o te Ao i te tau 2005, ā, i hinga i a rātou a Ahitereiria i ngā whiringa whāiti. Kāore kē a Ahitereiria i whai whakaaro ki te āhei o te tīma, ka tuku kē ai i ō rātou toa kaitākaro kia whakatā mō taua kēmu. Ka hua mai i tēnei ko te whiringa toa o te whakataetae ko Aotearoa ki Aotearoa tonu, inā rā e tākaro kē ana te tīma rīki Māori ki te tīma Kiwi Ferns kē.

Me pēnei te tohu i te whārangi:

Malcolm Mulholland, 'Te Whutupaoro Māori - Te wahine i te whutupaoro rīki me te uniana', Te Ara - the Encyclopedia of New Zealand, http://www.TeAra.govt.nz/mi/te-whutupaoro-maori/page-6 (accessed 23 September 2019)

Story by Malcolm Mulholland, published 5 Sep 2013, updated 1 Jan 2015